اعمال الشاعر عبد الله وداعه الأمين...

بحر الرذاذ


حفيان ادقّش جايي ليك
من زاوية القلب الودر
متكول علي بحرك رذاذ
الانتظار اللسه في عشم الامل
مصلوب يفتش في الدريب
مغلوب يجرتق في الحراز
يوم بايع المطر النده:
ايا انثى يا قمرا نبي
يا فاتحة جرح الانحياز
ما جابو ليك من سيرة الولد
الشمس
طاقة بتدخّل لي امس
ما كاسو ليك تاشيرة لي مدني المجاز
انا ما شرقتا قفاي حلم
ونحتّا صورتك ..وحيطة...
سبورة وجع
وعليها سكّنتك نشاذ
انا جايي ليك من حرقة الشوق-الوطن
شايل رهافتي عليك غنا
وقلبا شقاهو الاحتراز
يا موية.. ماعون الفتر
ناشف وانادي عليك تجي
لو كان صبر انا ريدي ليك
ما كنت شلتك اكتناز
وقدلتا بيك... عيني.... وضراي...
زاد غربتي... ودربي القديم
الصحبة والناس العزاز
وفرحتا بيك
فرحتا بيك .. ونقزتا نبي الله الخضر
بشّرتا... شنّقتك .... جريت
وكشفت سر الاجتياز
ما اصلي حفيان البسك
عطشان وساقيني الاسف
وانا بيكي لبّستا الرذاذ


عبدالله وداعه الامين
لندن – 09.11.2007

قدلت ماشه علي تتدفق

قدلت ماشا علي تتدفق
خيل امواج النيل تبراها
ماشا براها
الرمل الناعم.... طاعم صفق
شربت موية الدهشة وشيها
ذاتو مشيها
روحيتي الراحت قامت تشفق
نقزتا.... فرحتا ....قدلتا عليها
واشر ليها
...
تستر الحال
وعلي تترفق
شالت باقي النيل بي وراها
وحتى سماها
وما هماها
سحابي الدفق
...
....
وقدلت ماشا

قدلت ماشا علي شرياني
تسابق الدم ... والنفس الطالع
وتفتح شارع
بين احزان القلب و معاني
ندهتا رياح الخوف واللهفه
وايدا تهفا
وتشتاق ليها فـ كل ثواني
لا الافراح ادتني طريقة
نبض رحيقة
وباقي حريق الروح الداني
اتوكلتا رجعتا برايا
وباقي حجايا
واستنيت
في الباب التاني
....
....
وقدلت ماشا

قدلت ماشا علي نجماتا
لسان الحال ....عن حالو بيسال
حتى البسال
عن اسرار الكون في حلاتا
لا الغيمات كشفت اسراره
قالت ساره
تسر العين الشافت ذاتا
ويا نجمات البعد النايم
نيل وغمايم
وضل الشوق الفي نخلاتا
امرقوا سحاب المطر الفيكم
وما مكفيكم
افرشو النيل قداما سباتا
وقدلت ماشا


عبدالله وداعه الامين
22.09.2007 لندن

ما مشيت جواي ندهتك...

ما مشيت جواي ندهتك
ما سرقتك
من حواس الروح وجبتك
او جرحتك في ظنونك
ما بديتا معاي حكايتك
سر بدايتك
سر نهاية الدنيا عندي
وعندي كل الدنيا كونك
ما غريبة علي اكونك
مر شجونك
او تكونيني واشيلك
في حشاش قلبا بعزك
عمرو ما فكر يخونك
امشي في الدرب البشيلك
شدي حيلك
يا مشاويري وبشيلك
شيلي لي خاطر عيونك
ما عيوني بدون عيونك
زي مسافر
زي تذاكر حزن سافر
او حوافر خوف بتحفر
في قلب وتقولو سافر
وماهو راسم باقي لونك
والسفر بي الليد بقولوا
ورغم طولو
ايدي لو عرفت تصونك
او حصونك
كان مشيت جواك ندهتك
وبالفرح صحيت جنونك
صحي لي سكة ومسافة
ضل رهافة
ما اللطافه الفيك تصحي
وعمري ضايع بس بدونك
وماشي ليك لو فتي مني
رغم اني
واني بس لو ما التمني
كان هديت الروح دروبك
ودربي رايح من لحونك
وما رجيت لحنك يدندن
او يطنطن
فيني وتر الغربة يمكن
او تمكني لي سكونك
او جنونك
يا الظلمتك بي جنوني
واقتحمتا عليك سجونك
الا اعرفي كم بريدك
زي وريدك
بدي سر العافية ايدك
وفي القلب دايما سكونك


عبدالله وداعه الامين
لندن 29.04.2007

ما بين حروفك وسكتي...

ما بين حروفك وسكتي

ميلاد والفة وفرحي بيك

سميت حروفك هي المدى

وفضلتا في النوم اشتهيك

روحتا اثرك في الندى

روحتي روحي وكيف اجيك؟

وانا كنت رايح من زمان

جواك وسايب روحي فيك

رسيت حنينك في الفراش

الوردة هي الردت عليك

هتفت ونادت لي العبير

يفتح نوافير شوقي ليك

ويقول عليك انك اصل

كل الجمال والرقة ديك

وانك براك اصل الاصل

وانك اصل فرحي الوشيك

وانك كمان اصل الغنا

يا لحني من وين ابتديك

وانا كنت قايل هو الختام

جواي وناكر سر مجيك

دسيت ملامحك فيني بس

ورقدتا حاضن لي وشيك

ما بين نعاسي وخوفي جد

اخترتا خوفي معاي شريك

ونقزتا بيك شلتك معاي

جواي وقادل في مشيك

ما اصلو قلبك سكتي

وحرفك نهايتي ومنتهيك

يا سر صهيل الذكرى يوم

يا سري حتما مصطفيك


عبدالله وداعه الامين
لندن 10.02.2007

مين علم الموية المروق حفيانه تجري على البحر؟


اديني خاتر شوقي بس

ما تطولي المشوار

سفر

وان كان دروبك بعرفه.

والدنيا لو ما الناس..

بقت .....

سكة وجع بملا الارض

واحزان تهز المعرفة .

وانا راضي بي تعبك علي

ومعاك رضيت الانتظار

وعرفتا سر الارصفة.

ما الريدة مولودة

عشم

والفكرة بنت

الاحتمال

وانا فيكي صاهرتا الوفا.

لو اصلو كان الريد جفا

مين علّم الموية المروق

حفيانة

تجري علي البحر

والرملة موجك يخطفا؟

ومين الـ قال:

انو الرذاذ

بـ يجرّح احساس الصفق

لو ضمّا وردة ولفلفا

وغير تواريخي البقت

مكتوبة بي حرفك براك

في حتة عندك بالفا


عبدالله وداعه الامين
23.11.2006

مساماتك...


مساماتك بتتراقص
علي وعدا بكون اجمل
اذا انفتحت سماواتك
صباحاتك بتتجدد
مع الموجه البتتمدد
وتتطلع من عويناتك
وتتراقص علي قلبك
فرح شفع تبل الغيم
وتجري ورى سحاباتك
وكت يحفى الفرح ويروح
ويطلع من لحاف الليل
ويسكن في مساحاتك
ويمشيبك علي مشرع
نسى الميعاد بعد قرب
وتاهت فيهو خطواتك
وانا التاهت خطاي قبلك
علي مدنا بنيتيها
وراحت في مساماتك
ورحتا معاك انا الدرتك
تكوني الجنة لي تالاي
ونغمة حنينة في ذاتك
جمال احساس يدوبني
اجمّل لي سما ارضك
ويلوّن لي صباحاتك

عبدالله وداعه الامين
07.10.2006لندن

اشتقت ليك...

اشتقتي ليك
وانا قبل ما اشتاق واحن
بشتاق صباحي عشان اجيك
بشتاق معاي زمني الوقف
والخطوة تنده برضو ليك
وتوصي ليك كل العيون
دايراها هي التتوصى بيك
وتغني ليك
يا ماشه بينات الحنين
ومحننه الشوق بي ايديك
لا شوقي نقص خوفي يوم
لا كان عزاي خوفي الوشيك
يسرق نعاس عيني البقت
ترجاكي في النوم تشتهيك
بس خوفي من شوقك علي
يفضحني قبال ابتديك
وانا بيكي باهيت النجوم
وريني كيف انا انتهيك

****

يا روحي بشتاقك واحن
اديني معناي ادخلك
وريني كيف الاشتياق
وحنيني لمن يدخلك
و اودرك بين المسام
وعيوني تقدر تسالك
بالله مين الاصطفاك
جواي وشالك بدلك
بي ليلو والزمن الوقف
محتار وخايف يوصلك
يا واقفه بين روحي وانا
وريني مين الرسلك
وكساكي من كل الجمال
والروعه هي البتمثلك
اشتقتى ليك يا روحي بس
وريني كيف استحملك
واتوسدك جواي واقيف
بي فرحي ديمه اجملك

عبدالله وداعه الامين
لندن 17.05.2006

اكسر حدود كل الفرح....


اكسر حدود كل الفرح
وفواصل الشوق الوقف
يتعلم المشي شان اجيك
اسند خطوط طولك علي
وارويها من لوني النشف
في عرقو بسال عن عينيك
عن سكة بتسوق العمر
في لحظه تسرق روعتو
وتجيبو عندك بين ايديك
علشان ايديك بتحس معاي
انو الزمن لسع جميل
وجمالو بكبر برضو بيك
والريد معاك بكبر شديد
معناهو بتعدى الخيال
الديمة بشرب من وشيك
وانا من وشيك بسقي الجمال
لو يهدا بي مره السفر
وسط الغمام الكان وشيك
يندسى في مطرك علي
يا ساقي ريحك من صفاك
ومعلم الايام مشيك
انا اصلي متعود معاك
انو الرذاذ اصل المطر
جواي وقت يرشح عليك
وانو الربيع اصل الفصول
الديمة بتجيب الفرح
والديمة برضو تودي ليك
عبدالله وداعه الامين
لندن ‏20‏‏.‏12‏‏.‏2005

اندسي جاي.........


القصيده دي بحبها يا عبد الله وعارف ليه


اندسي ما بين المسام
او حتى بينات الضلوع
اتلاشي في وسط العروق
اوعاكي تشتاقي الرجوع
اشتاقي لي جواك انا
تلقيني بيك تامي الخشوع
وسادي بيك عصب الوله
متوسدك قبل الركوع
اتباها بيك جواي فرح
يا ستي واتناسى الدموع
اندسي جاي

اندسي ما بيني وانا
واتلاشي جواي الهفيف
وانشري يا كل المنى
زي موجه تتلقى الرصيف
بي لهفة تحضن ضفتو
جواها يصيح كلو قيف
يا قيفي من قبل النزوح
وريني اتلقاكي كيف؟
كيقن احسك في المسام
او حتى في نفسك اقيف؟
وتكوني يا غيم الولف
اشواقي والفرح النضيف
واندسي جاي

اندسي في كل الخلايا
وفرهدي.. وابقي الندى
واتماشي بينات الحواس
امكن الاقيكي الصدى
او ضحكة عشقت ضحكتك
وبسيمة تتحدى المدى
تلقيني بيك طايل السماء
قبال سماك يطوي النداء
لي زول بفتش روحو فيك
بمحنة غالبو يهدهده
بي شوقو فتّر ضي عيون
سطوة غيابك سهده
اندسي جاي


عبدالله وداعه الامين
لندن 2005‏‏-‏06‏‏-‏25‏

ينصر دينك.....

ودي بموووووووت فيها وعارف برضو وحانزل الرد قريب

ينصر دينك
ودين ابو اهلك ذاتو
ودين ميتين ميتينك
ياخي بحبك جد من جوه
ومهما اقول تلقاني مدينك
يا عولاق الشوق الساكن
في الانفاس خليني ادينك
يا الفجرتا الحب الساهي
ويالصحيت جوايا طنينك
فرتق عقد الريد يا سادن
للبهواك وتركتو سجينك
اقطع وهج الشوق بي وشك
ياخي تعال ادينا سنينك
اعطن وش الناس التسال
في الافراح نسيها انينك
مرمط ايد الشوق الخدرت
في الاعياد واديها رنينك
شوفا دوام عن حالك تسال
وخايفة تكون فطسته معينك
يا موهوم بي وهم الحاضر
وشايلة الدنيا محنة يدينك
سجم امات القلب الرادك
لو بيكوس ويخلي معينك
العن يوم الشوق العفن
وما اداني معاني تصينك
ياني بريدك مهما اكابر
يالرسيت جوايا حنينك
ومهمه اقول يا سيدي بحبك
ويا محتال بس الله يعينك
تقدر تخدش مر احساسي
وفي الاشواق تلقاني رهينك
ومحتاج ليك لو عترت ايدك
فوق الريد سكرت رجلينك
خامة رماد قلبينا الحرقو
في الاشواق رسمت خدينك
وينصر دين ميتين ابو اهلك
ودين ميتين ابو ام ميتينك
وينصر دينك


عبدالله وداعه الامين
لندن 15.08.2005

غياب......


كان غبتا منك ببقا فيك
ماتكوني بس فيني الغياب
يا فاردة بي ليل الشجن
مكحولة زي مدن السراب
برجاكي فوق ضل الامل
بتحدى بيك وهج السحاب
يا غبته جواكي الفرح
يا كنتا في نبضك عزاب
بس كوني بي انتي الوهج
وابقيلي شوق كل الصحاب
يا شاتله جواي الفرح
وحنينة زي مطر التساب
اقراكي بس وريني كيف
واجيكي بس من ياتو باب؟
***
كان غبتا منك ببقى بس
جواكي وافضل مشتهيك
و وراكي زي ضلي السرح
يوم جيتي يا اجمل شريك
فرحانة بي فرح المطر
والموية بتسابق جريك
شلتك معاي موجة عشم
ومحنة حلوة فرحتا بيك
بعتزى بيك تحتك ارض
يا خوفي من خوفي الوشيك
انو الغمام يروي الارض
وانا في غمامي يضيع وشيك
والسكة تنكر من وراي
خطوي الزمان ساسق مشيك
***
كان غبتا منك فيك بغيب
شايلك معايا محل محل
سافرتا بيك كل الدروب
وقطعتا بيك سكك الوحل
لاغيمة هدت حيلي يوم
لا هزّا احساسي المحل
لا مرة مليت من مشيك
لا حفيت اشواق الامل
فرحانة بيك روحي السهت
واطانشت روح الملل
يا سارقة من عيني النعاس
وحنينة زي كل الاهل
شيليني في كفك بجيك
قبال يشيل كفي الوجل
عبدالله وداعه الامين
لندن 03.08.2005

وريني من وين ادخلك..
انتي الخطاوي...
الماشة مني
وطالعة منك ..
و جايه فيك.
متساربة
في الروح اشتهى..
مشدوهة ...
تسأل عني ليك.
هذيني جواك ..
صوت مطر..
جدول فرح ..
منك وبيك.
واديني بحضورك عشم...
خليني ساكنك و مشتهيك.
وريني من وين ادخلك؟
او حتى من وين ابتديك؟
سدي المساحات الندى..
وادي البحر...
من صوت مشيك.
امكن غماماتك تفك..
وش السماء..
وتحضن ايديك.


عبدالله وداعه الامين
لندن 06.05.2005

بساسق فيك وما عارف...


بساسق فيك وما عارف بصادفك جوة ساكنة معاي
و دافقه هواكي جوه الغيم محنة علي قليبي الجاي
بيحلم تاني زي اول دعاش مطرك يدفي سماي
سما فرحك تقطّر ريد ومن ريدك يضوي غناي
واتحكّر عليكي ربيع عشان القاكي يا معناي
موهطة في جبين الشوق ترقصي للفرح جواي


بساسق فيكي بس عارف مكانك اشتياقك لي
ولو سالوني عن دربك بقوم اسال عليك عيني
اشاور سكة الخاطر اذا الخاتر هداني علي
لان السكة شوقه طويل بمحّق روحه كتر الجي
ودربك لسه دربو بعيد بعد شوقا بساسق بي
علي نَفَسك وقت يرتاح ويطلع من مسام الضي

بساسق فيني موج الشوق وبتنفس فرح رؤياك
وخايف اني جوة الشوق اجي و انساكي انتي هناك
مودرة بين جروف عينيك وبين خوف العيونو معاك
وبحلم بيكي ساكنه هناك وتحلمي بيهو في دنياك
تحرقي روحو بالدهشة وتشحتفي حالو بي لقياك
عشان يسكت حنينو الكان شرق قبل التمني غشاك






عبدالله وداعه الامين

لندن 04.03.2005

شكرا لانك معاي...



وشكرا محنة لانك معاي
محافل بتضحك تزين سماي
سماك البتفرح بتزرع جواي
مداين تلون معالم رضاي
تكوّن عوالم بترسم حشاي
خيوت المحبة البتفضح غناي
شوارعك تصارعك تدفر بكاي
تخت الحقيقة وتغتغت وراي
مصايب تجقلب تعكر صفاي
احبك حقيقة والى منتهاي
لانك حقيقي بتدهش رؤاي


عبدالله وداعةالامين
لندن 23.04.2005

وصوني عليك...


وصوني عليك اجراسك مرة
انقر عصب الوجع الساكن
في عينين الضحكة الحلوة
وافرش ليك القلب مساكن
شان اتلقى الشوق من ايدك
زي عيدية الزول الساكن
بي الايجار في بال الذكرى
وبحلم يزرع قلبو اماكن
للحبان في حوش ابنيهو
يجمع شمل الريد الساكن

وصوني عنيك لي عيونك مرة
ارسم ريح الغيم الماطر
ادي الريح مفتاح الغنوة
التهدي غناي الديمة مشاتر
نبض الحال البفضح ريدك
رغم الضل الختّا الساتر
بين انفاس الشوق الطول
والاحساس الجبر الخاطر
واتمناك تبقيلو الخطوة
بين البال والقلب العاطر

وصوني عليك قلبين اتلاقوا
بين الغيم والمطر النازل
يوم اتلموا الريد و الالفة
دون ميعاد او حتى عوازل
وصدقو انو الالفة بتنفع
لو العشره بتبقى منازل
للحبان وقتين اشتاقو
وشوقم يغلب حال العازل
زي السكة تخون اللهفة
ويبقى مصير اللهفة مهازل


عبدالله وداعه الامين
لندن 22.02.2005

يــــا مــدهشــة



يا مدهشة......يامدهشة
يا مدهشة و رويانة من لون الفرح
ادي العصافير الصفات
ادي المواعيد ...الوسامة
الفيها يرتاح المرح
وادي الفراشات النبات
ادي النسيمات الرحيق
وسلافة الورد الجروف
ورهافة الحس السكات
و انشري في خاطر المدى
البتشابا لي صوتك نغم
و اديهو من وقعك حياة
و اديني من وهج الغنا
القلناهو في زمن الخريف
زغرودة لي زمن الشتات
و اديني من عشقك وطن
يرتاح علي خيوط الندى
ويتمدّا في كل الجهات
و اديني من شوقك عشم
يدي النجيمات الفضول
و يبدل الشقى اغنيات
و اديني من بعضك فصول
تجرح تباريح الذهول
تهدينا نبض الامسيات
يا مدهشة.......
و رويانة.....
بي حضور الغياب
تعالي نستنى اللفات
ادي الحضور من دفتر
احساسك سطر
وعبارة تحلم بي فتات
الفكرة في موكب فرح
رتب تسابيح المحنّة
وبلى ريق الذكريات
يا مدهشة
ادي السفر طعم القمر
والقمحة حتة شوق دفر
وادينا منك بعضيات
الالفة لي زمنا سخي
نرجاكي نستنى الربيع
ونحاكي مشيك في ثبات
اديني منك كل شيئ
اتهجى حرفين المشي
واتلاشى جواك امنيات
يا مدهشة
و رويانة من لون الفرح
معطونة في الزمن الشتات
يا مدهشة
يا مدهشة




عبدالله وداعه الامين
لندن 09.01.2005

خباء الروح...


لا وقت يكفي للبكاء صغيرتي
فلما البكاء
ضمي خباء الروح فاتنتي
و التحفي جناح الصبر ثانية
فالخيل تركض في جناح الشوق من وله
ليحتضر الرجاء
قولي كما قالت
فراشات الربيع هنيهة
الوقت لا سيف يضارعه
و يقتله اشتهاء
الوقت ان نحيا كما نحيا
على ساقين من فرح
و نركض في جبين البحر
سوسنة .........
و نمتد ارتواء
و العشق ان نحيا على ظمأ
على الارواح من تيه
و نسرق من عبير الشوق سنبلة
ونغرسها على سفن اللقاء

ادمنت من سفري
ازيز الصمت......
اسألتي....
فما ابتلت على الاحداق اوردتي
ولا نامت مزامير النداء
كوني كما قالت
رؤى الاحلام...
قافلتي....
و ابني على الزندين اوراق
من الصلصال نلبسها
ليبتسم الشتاء

ردي رداء الشوق ثانية
اذا ما الريح قد نامت
على الطرقات من جوع
و ارتبك المساء
و تلفحي ملح التوقع برهة
فانا الذي الف الرحيل بحزنه
و بنا البيوت من الضياء

آه على شوق يكابرني
بعمق البين
اسكنه......
كما نفسي...
يغازلني....
و يورثني الغباء
و ياخذني الى عينيك من مطر
يراقص همس ارصفتي
يحولني غناء
فلما البكاء؟
ولما البكاء؟


عبدالله وداعه الامين

لندن 05.12.2004

شوق الشوق...


الشوق مداهو الشوق
جوة الحلق مربوط
منضوم مجرتق ريد
اتخاتفنوا خيوت
من الطبيعة تشيل
حس صوتك المكبوت
يا امي كيف الحال
اشتقتا لي البنوت
لي اللمة جوة البيت
الصفقة و الزغروت
لي شارع الحلة
لي الما بنوها بيوت
لي الناموا تحت الضل
ما عرفوا شدر التوت
لي الباتو جيعانين
و القاسموا الكتكوت
في حبة القمحة
وسابوا الرزق مختوت
في مخزن السلطان
و الداروا في الملكوت
انا شوقي لي القاعدين
لي البي السهر ممعوط
و الشالوا صبرم توب
ما لبسو ورق التوت
لي الشبعوا ما ماكلين
لي الاكلوا حس الصوط
فوق الحشى المغلوب
بالمرة عدموا الصوت
تموها موية حق
والحق سطر مفطوط
من دفتر الاحساس
الفينا كان مفروط
و الليلة كيف النيل؟
يا امي كيف النيل؟
دا الكان زمان مبسوط
ما شفتو كشّر يوم
لا في مراكبوا بجوط
يا امي مشتاق ليك
شوق الحشى المزلوط
مشتاق لي ريحة الطين
للبورة و المحروت
قوليلي اوصل كيف
باقي الدرب عكنوت

يا امي مشتاقين
ليك التحية تفوت
طيبين وجد سائلين
عنك بنسال يوت
و ان كان سؤالك لي
كيفن نهارنا بفوت

بنقولوا مستورين
وتوب الستر مبهوت
كيفن سترت الحال
ان كان عرقنا زيوت
ان كان بناكل ذل
كيفن نجيب القوت؟
نتوضى نار الشوق
والشوق حلف ما يموت
و ان كان يصلح الحال
و الله نحنا نموت
وتكوني انتي وشاح
جوة الفرح منحوت
بس سيدي سيد الهم
حكّم علينا الموت
و ان قلنا ما بنموت
بدينا بطن الحوت
نكتب علي الصلصال
مشوار املنا شخوت
نرسم جبين الخوف
خطين علي المسكوت
و السم يبل الجوف
و الجوف مكجنه موت
يتمدّا في الكرعين
يدي الكرش شلوت
وياخد من المألوف
يبقالنا برضو سكوت
وان مرة قام اضحك
ببقى الضحك مخفوت



عبدالله وداعه الامين
لندن08.12.2004

وانتي بعيده....



و انتي بعيدة عن عيني
بسوقني الشوق و يحضني
و اسافر جوة في عينيك
عشان عينيك تقالدني
تسوقني علي وتر فنان
فرح انغامو تهزمني
اشيل اللهفة شان القاك
الاقي السكة تحرمني
ومن اللهفه تاني اشيل
عشان انساها احزاني
تقوم السكة تاني تدور
سنين الغربة تنهرني
انوم اتمنى لو القاك
و احلم بيكي من تاني
عشان اديكي كل الشوق
ندى و اسقيكي تحناني
الاقى الدنيا تفرح بيك
و انا الكاتلاني نيراني
تجيني حنينة شايله هواك
تخدري بيهة بستاني
تقول عينيكي كل الشوق
و يفرح بيكي وجداني
تقول يا سيدي لو توعد
اوعا تفوت و تنساني
و ما تستنا لي باكر
بخاف الوحدة تسرقني
افوتك انتي بس كيفن
و عارفك انتي روح مني
و عارف انو شوقك لي
وقت يشتاق بشيل مني
خيوط الالفة لي باكر
يعطّر بيها الحاني
يرقص بيها كل الفيك
حتى فريعك الحاني.


عبدالله وداعه الامين


لندن 23.11.2004

وتر الحزن...


وتر الحزن شبّا
و الليد تدافر الليد
خاطر الفرح عبّا
بحر العواطف ريد
يا قلبي ليه تحتار
القسمة ما بي الليد
اخترتا تمشي براك
بي الدرتو ابقى سعيد

قيفك حضن للشوق
شوقا يودي بعيد
ملهوف و قلبي عليك
و الله حزني شديد
يبس الحلق في الجوف
انكبى فينا الخوف
مسخت ليلي العيد
هجرت عيونا الشوف
ما بين قعاد و وقوف
حتّا فرحنا بليد

يا وتري شن معناك
لوما بتزيد تغريد؟
ايه ابقى معنى الحب
لو ما بسبقو الريد؟
يا وتري خلي النم
يمسح نزيف الدم
وقتين رموكا شهيد
شد الدواخل هم
بيتين عزاب و ندم
زيد الوجع تشريد
اسقي القوافي وهم
ما يبقى فيها فهم
خليها في التسهيد
من الوحل ننحل
ايد الحزن تنشل
ان شاء الله ايدا ايد
خيط الفرح ينسل
من بين خدودنا خصل
خرزا حرير و جريد

يا وتري شد الحيل
ما تبقى ديمه عنيد
حبك سكن بي الحيل
حوّل دواخلي نشيد
من كوستي خلي هواك
يمطر جبال توتيل
ام در تزغرة شوق
ترقص اعالي النيل
يغشى الفرح ملكال
يكبر يعبي النيل
يتهادى للخرطوم
فرحا يدافر السيل
من باره لي كسلا
مدني وجزيرة الفيل
كادقلي يا دار فور
غنّت فرحنا قبيل
من حلفا لي نمولي
سنار و حمدالنيل
فاتت علي الكرمك
من شندي شاده الخيل
ما تنسي يا رمبيك
موسم فرحنا تقيل
خلي البلد ترقص
طربا يهد الحيل
لي عزة قولي خلاص
ودعنا عهد الليل
والله ما ناسيك
ولدك و جمل الشيل
فارسا يواسي الصف
وقت الصفوف بتميل
منك بشيل حسي
شبهي و ببقى اصيل
شمسك تبق جواي
تخجل كهارب الليل
تغشى البيوت بيت بيت
تضوي الفرح قنديل
اتقصّر المشوار
و الخطوة صبحت ميل

و انحنا بيك نكبر
و نظرنا يقوى حديد
وتكوني انتي ملاذ
قبله و تكوني وريد
تلفينا نفخر بيك
تبقيلنا انتي السيد
يدينا بيك تبني
تجدع بعيد لي بعيد
و نغني عزة هواك
نحنا الجنود وعبيد
نحنا الجدود العز
خرزا يضوي الجيد
تلفينا نفخر بيك
تبقيلنا انتي السيد
تبقيلنا انتي السيد


لندن

27.08.04

رحيـــــــــق الصمــــــت
--------------------------------------------------------------------------------
آنسني المكان
ودعت احزاني
وسرت كما تسير قوافلي الظمئ على رهق
ويتبعني الزمان
انزلت ليلي عند مفترق الطريق
كي يفهم الصبار
... اغنيتي
المديح.
الشوق
كي ترتاد احجيتي نهار البرق
تنسيني سويعات الرهان
لو اشتري صدر الصباح بفرقدي
لكسوت من صخب البيوت ضفائري
وبنيت من عصب الزمان وسائدا
تروي من الاشواق عصفوري
على وتر الكمان
لم اشتهي مثل الغريب محبة
تفدي قرابيني
فالشمس قد قذفت حبيبات الندى سفرا
على بحر التوهم
تستظل من العراء محبتي
و الارض اثقلها الكهان
لا شئ فيّ البتة اجمل من غدي
المصلوب في وجع النهار
لاشئ يبعث من جبال الصمت
اغنيتي ـ الرحيل
ويفجر الازهار من رحم التوقع تارة
ليزيل من مدني عزاب المستحيل
رباه هل حان الاوان؟
الخيل قد ضلت طريق الليل
اختبأت على كفي
ونامت ملئ جفنيها
تمدت مثل ساعاتي التي لازلت اذكرها
وقد لبست شعيرات الاوان
وتمد في وجعي رحيق الصمت
وانكفأت على الزندين اطرافي
فما ابتلت على الاهداب اغنيتي
وما بسمت سمائي اقحوان
ليلاه ما هذا الهوان؟
لم اصطفي وجعي على الفرح الذي
ضيعت احرفه بعمق البين ادفنه
على صدري فينسيني البيان
لم اشتهي سفري الذي لا ذلت احمله
بكف الغيب
انزله مقام النفس من جوع على وجع
ليلبسني و يلتهم البنان
رباه هل ضلت بحار العشق ملهمتي
تمطت في ذرى الالواح
و انكفات على ليليّ
واستبقت على الامواج افئدتي
وبارحني الامان؟
رباه ارهقني صراخ الليل
اتعبني عواء الريح في صدري
تقاذفني ضجيج الوقت
بعثرني على وجع الموان
لاصوت لي الا الذي بحت خواطره
على مدني
وامتشقت جبال الريح عتمته
وغنته الجنان
وتلفحت بالريح خصلته
على الاهداب واخترقت
مسام الروح طينته
فبدلني و فجرني دخان
رباه نسألك الامـــــــان
رباه نسألك الامـــــــان

مشتاق...

كيف اقول مشتاق وعارف
اني مشتاق ليكي اكتر
كيف اقول وانا شوقي شايف
هدى حيل احزاني فتر
والحروف بخلت عليا
وعرفت انو زماني اشتر
وسكة الريد القديمه
الكنا فيها نتوه ونسهر
كل يوم تسال عليكي
وبسأل الوجع المقدر
وليكي تشتاق الخطاوى
ولهفة الشوق المودر
كل دواخلي تقول بريدك
وبيكي فرحي بزيد وبكبر
وبرضي مشتاق لي عيونك
يوم غشاني حناني بدر
برضي مشتاق ليكي انتي
ولسه مشتاق ليكي اكتر
*
بلقى همسك فيني ساكن
جوه في اعماقي نقر
ولما اتزكر كلامك
وكان كلامك كلو سكر
تمشي تاخدني المسافه
وبيكي القى زماني نور
حبك انتي ربيع حياتي
و شفتو في وجداني حكر
والله مشتاق لي بسيمتك
يوم تهل عسلا تقطر
ولي خطاويك العزيزه
و للعيون الحلوه تسحر
ولي زمن قولة بريدك
ولي سحابي الشال و مطر
ياني مشتاق ليكي انتي
ولسه مشتاق ليكي اكتر