خرطة وطن..

خرطة وطن مرسومه بي طعم الشقا...
مسكونه جوه قليبو عادا ورتّقا...
محبوره من وِردو اليمين ومعتقه...
وصفة غريب عشق المسافات جرتقا...
ومن كركبة روحو المروّحة منطقا...
لوّن فصولا................مفرتقه..




خرطة وطن خافت معالما وانتفت...
من جيبو زحلقت اختفت....
فتش يمين..فتش شمال..نكّت..بحت..
عاشت معاو قصة وجع من عشقو لي ذاتها بكت...
ما اصلو ريدا عليهو حق لا قشقشت دمعاتا لا قالوا استحت...




خرطة وطن شافت غريب عاود طفل...
عاود مضيّع في العناوين السِّجل..
قامت جرت واتدسدست خافت يكون شبح البطل...
سألت منو؟من بين حواجزا في خجل...
انا يا بلد ولدك مسوّق بالقدر جاييك ضيف عاود حنينو ومرتحل...
شارب ضياع نازف سنينو على الرهاب...مخنوق وجَل..





خرطة وطن ما عرفتو...
ما ضاقت المر في تفاصيل قصتو...
ماشافت الحزن المغلّف ضحكتو...
اريتا لو نادتلو هوي ارجع تعال من قبل ما يغرق وكانت وصّتو...
اريتا لو سرقت جواز سفرو وبعادها حرمتو...
ما كان بكاها وغلبتو...
وما كان خسر انفاسو من بين رعشتو...





خرطة وطن.....وانا هو الغريب...
انا هو البفتش للزوايا المنهكة ..لو يوم يطيب..
انا هو المكتّل بالسكات مسجون اساوير النصيب...
انا هو المسطِّر(غربتين) محروق قليبو مع اللهيب....
انا هو الضنا....ياني...الغريب...

سلمت وسلمت أناملك على هذا الشجن

سلم اليراع الذى كتبت به أختى
كلمات يعجز لسانى عن إفائها حقها
سلمتى

بنت النور..لم اجد كلمات تليق بك..تليق بجمال ما نثرته هنا..
فلك مني كل الود..

اخوتي........شكري يسبق وجودي.....خجلي من كرم التفافكم حولي.......الله لا يحرمني منكم......ود كثيف