ركن الشاعر مازن الجمّال...

شوق للبلد..
شوق للنيل
وشجر نخيل
وشمساً باردة وراه تميل
وأرضاً طيبة وطينا وحيل
وشجر النيم الضله ضليل
وغصن البان فرحان بيميل
شوق لليل
وسمر الليل
وشلة ونسة مساهرة الليل
في ضو القمرة الكاشفة الليل
في الرملة الباردة الشاربة النيل
وفي نص الونسة الشاقة الليل
نسمع صوت غناوي الليل
ونتنفس نسايم الليل ..
شوق للناس
وطيبة الناس
الصافية قلوبا بدون وسواس
والعامرة قلوبا بالإحساس
والطاهرة قلوبا بحب الناس
والماخدة الطيبة وجوب وأساس

يا بلدي
تهنا هناك واتعذبنا في بُعدك
شربنا المر وعشنا الذل بعيد عنك
صبرنا كتير نفتش في وطن بَعدك
يكمل لينا من نقصا بدر منك
محال لكن نلاقي هدفنا غير عندك
أو صدراً يسعنا جميعنا غير صدرك
نلف نرجع نقول إنك..
عزيز وانحنا اتعذبنا في بُعدك

رحلة طير




الخير في الطير البلعو الريح
الطار في الليل من غير ترويح
....................................
كايس لي وطنا كونه فسيح
لي موية وخضرة ونسمة ريح
لي شعبا طيب وقلبه جريح
مجروح في مشاعره ودمه يسيح
ماتت احلامه وحظه الراح
معفوصة بجزم اقداره ارواح
والارض الكانت ليه براح
اندفنت بي دم الأشباح
والكل أصبح املاك سفاح
حكم الأرض الكانتلو براح
والطير فارق احلامه وراح
واصبح في عالم مجهول لاح

الطير اتلفّت وين يبدا
والوطن الراح بوراو عدى
وصوت الخوف للصدى رد
................................
الطير اتذكر زمنو الراح
اتذكر اهله وحبه الفاح
اتذكر شلة ونسة فصاح
لمة حبان وبحور افراح
واتذكر امه مع الفجرية
اتوضت صلت ركعة هدية
وجاتو تصحيه بكل حنية
يا طير قوم اتوضا وصلي
واكسب خيرها دي دنيا رثية
وفجاءة اتذكر بطش الظالم
جاهم في ليل منحوس غايم
ضبح اولاد بلده حمايم
وقرض الطاير منو وحايم
وفتّح لعيونه واتلفّت
واوجاعه المرة عليو حفّت
وعيونه عليها دموع جفّت
وانوار الحلم وراو خفّت
وعاودله ضلام الليل وانينه ..

والطير الواجه وش الريح
هلكان وبعافر وجوعه يصيح
...............................
قبّل من دربه قراره صريح
يرجع للغربة بدون ترويح
ودموعه الحارة بدت تنزل
تغسل من قلبه هموم وتريح
وافكار الطير راحت لبعيد
لي وطنا ينزل فيه نزيح
والطير في طريقه لقالو ضريح
والناس حوالينه وكله بصيح
ومعاهم شيخ واقع تسبيح
والطير قرّب عاوز يندل
للصورة الواضحة الليو تكمل
والكل مشغول عنو ومُهمِل
والطير بعيون الدهشة وصل
في الارض إنهار وقليبو وقع
من شاف الجوة ضريحه نزل
الشعب الصابر الموته حصل
واتذكر ارضه وكله أمل ..

الطير لملم أحزانه وطار
والجو حولينه غيوم وامطار
..............................
والرعد الصاخب الضارب الغيم
اتذكر بيو غضب الجبار
الزار الارض الواسعة نضار
دمر اشجارها وسابها دمار
والطير مسكين هلكو المشوار
خارت قواه من الاسفار
غمض لعيونه وغاص في ظلام
يائس في ليله بدون احلام
والريح اتولت امر الطير
كانتلو وسادة خير وسلام
هبطت بيو في أرضاً واسعة
مفرودة سهول وحدودها ضلام
والطير النايم وحلمه جميل
راقد في غيم ابيض نسّام
وأمه الطيبة الحلوة عيونا
بانتلو في توب ابيض قسام
قالتلو يا طير فتّح عينيك
ده دربك ويل ومخاطره جسام
وفجاءة الغيم أصبح نيران
وحرقت جوف طيرنا الحيران
وانتفض الطير من هول احلامه
وفتح لعيونه وكان في أمان

الطير فتّح لعيونه وقام
والدنيا صباح ونسيم وغمام
.............................
بحلق حولينه وكله ذهول
من حسن المنظر كان بسام
والخضرة عجيبة امامه سهول
وزهور الفل زادتا انسام
وجداول موية خريرا عجيب
مناسبة موسيقى من الأنغام
والطير إحتار من المنظر
معقولة يكون لسة بيحلم !!؟؟
أو إمكن مات في الرحلة الشوم
وفتّح لعينيه في جنة سِلِم
والطير إتلفّت حوله وحام
إمكن يلقالو دليل ينضم
والجنة دي واسعة وخيرها وفير
بس خاوية كمان من زول بنضم
والطير منحوس ..
في الجنة يكوس ..!!
كايس لي شر حظه المنحوس
الجنة يا طير جوها الأشرار
قلبوها دمار والدنيا عبوس
شتتو سكانا واطفالا
برجول الشر الكل مديوس
والفاضل من الجنة يا طير
سموه الكل ( وادي المنحوس )
أطلع يا طير من وادي الشر
وامسك لطريقك وللخير كوس

يا طالع الشدره


يا طالع الشدرة
جيب لي معاك احلام
احلام بلد فقران
غرقان في بحر انعام
والنعمة منتشرة
في ارضِ طينا تمام
مزروعة جوع ومرض
غير العوير القام
والموية سيل ممتد
شاقي الارض قدام
والفايدة عند الفوق
وانحنا لينا صيام
والخير حلف بيمينو
يغشانا تاني حرام
ما انحنا جيل فقري
موهوم بكوم اوهام
غرقان بِفكِر فيها
في دنيا الاحلام
بس لو نفكر صاح
ننسى العلينا وحام
نزرع ارضا سهول
بالموية نروي حطام
لابد لينا نجاح
يرفعنا لي قدام
بس ننسى كل الفات
من مشكلات وخصام
ما انحنا دم واحد
نرجع عموم في سلام

يا طالع الشدرة
جيب لي معاك امان
امن البلد معدوم
من زارتو الكيزان
كيزان بتغرف دم
دم الصبي الحزنان
زاروه نص الليل
في البيت عشان مزدان
عاوز يقول الحق
في غابة الاحزان
جروه من رجلو
زي الخروف والضان
اصوات حريم طلعت
لمت عدو وحبان
ضربوه ضرب الموت
والدم بكب اطنان
ساقوه في ليلو
لمكان وراه مكان
ونكير شبيه وقف
يسأل عن الما كان
لو رد بالايجاب
يا ليل سواده جبان
مضروب كمان لو كان
بالرد نفى ونكران
والضرب كان قاتل
للروح مرق احزان
والضربة كانت حد
سالت دماه انسان
ارتاح من اوجاعه
دم النضال إحسان
يا دنيا ختي الحد
او سيبي ضبح الضان

منو القال...

منو القال للسحاب إتلم
واهطل يا مطر ألوان
وأروي سهول غشاها عطش
واسقى غصون شجرة البان
شجرة البان دي أصل الخير
جزورا عميقة في الوديان
وكلها حب ولامة كمان
حواليها الزهور بحنان
حنان امي حنان مليان
وقلبها بالفرح رويان
شجرة البان دي ما امي
ومشتاق ليها يا انسان
والاشواق بسوقا سحاب
وتهطل بالدموع في البان
وأخواني الصغار ازهار
مشبعة بي نداها حنان
بجيك يا يمة اصبري لي
بجيك اشبِع قليبي امان

منو القال للشمس تطلع
تغازل بي خيوتا زهور
تمد النور عشان يوصل
يغطي سهول ويدفي بحور
شمس ما حارة حراقة
شمس دفاية مشتاقة
وحبها للجميع مجهور
شمس بالخير تنادييلنا
ووصفها بالجمال زي حور
وحور من جنة ضواية
بتلمع في ضلام مسحور
شمس تبعد ضلام الليل
وتنصر كل حزين مجبور

منو القال للدموع تنزل
تبل وجه الفرح احزان
وتعصر في القليب اهات
بتطلع حارة من وجدان
ما دموع الفرح حلوة
وطعمها بالسعادة أمان
واما طعم دموع الحزن
مرة ومالحة من الكان
لكن في النهاية دموع
وكلها للقلب سيان

يا دنيا ليه..

يا دنيا ليه دايما كده
كل الظروف متمردة
حظ الشقي الما خلّا باب
في الدنيا لافي مُحّددة
لا طال حلم لا طال نصيب
بقراية كوم متعددة

يا دنيا ليه دايما جري
ما تقيفي مرة واصبري
مستعجلة ولاحقة الشنو
ما كوم حصادك مُهتري
والفايدة مبلوعة في كروش
تاجر ضلال أو مفتري

يا دنيا ليه دايما عذاب
أسفار بعيدة واغتراب
كان فيها ايه لو خير بلد
بالعدل مقسوم بالحساب
ما الخير كتير ما بدور سفر
وضياع عمر محسوب سراب

يا دنيا ليه دايما حزن
دايما دموع وقلوب تئن
وسواد كثيف دخان ألم
نابع من القلب السِخِن
وغراب كلام بوم الفقر
ساكن معشعش في البدن

يا دنيا ليه دايما ضلام
وغيوم مكدسة ليلا دام
وسكون عجيب مبتور لسان
محروم بيهمس بالكلام
وعيون مقدقدة بالسهر
عميانة تسبح في الظلام

يا دنيا ليه ما فيك أمان
والظلم آمر في الزمان
والخوف دخل نخر العضم
والسوس ده هو الندل الجبان
والروح مُعّذبة بالسكوت
سِكّين عذاب وسياط هوان

يا دنيا ليه دايما كلام ..

نيل واه

وقفت هناك سحبت حجر
وشلتو وجيت عليك يا نيل
بدور احكيلك المصرور
قبل يطلع علينا فجر
قعدت عليو بديت أشرب
نسيم الليل سرحت أجر
واعاين للشدر في القيف
بيضحك مبتسم مُنشر
هو كان فرحان هو كان مالو !
بعاين ليو وشيشو يصُر
بديت أغرق واشوف احلام
وجمبي النيل كأنو فتر
واتاوق للأرض بعدت
هناك فاتت ولبست توب
خدار ممزوج بلون أسود
شدر صفصاف عليها طروب
لكزت النيل بدور أرقد
فترت من القعاد منصوب
وفتّح لي عيونو حُمر
وقالي الخير وشن مطلوب
وقالي كمان متين نمت
فترت عديل وقلت الروب
خجلت كمان أبيت أنضم
وشايف النوم غشاو يادوب
وقفت أشابي للقمرة
بدور ألمس وشيشا كمان
وضحكت بي خجل بعدت
وساقت للنجوم بحنان
عرفت السر وكان الغيم
بجرجر في الرجول كسلان
سرحت معاو سواده عجيب
سواد هماً غشانا زمان
وعشعش في القليب خيّم
وبدّل فرحي بالأحزان
هربت بعيد بدور أنسى
لقيت الرملة فاردة امان
فرشت عليها صنقرت
بديت أرسم حلم ممدود
مدن أفراح ابت تتلم
عجاجاً فرزعك مقصود
رسمت قلوب وفيها سهام
بتنزف والجرح مقدود
ومرة رسيم وشيش مبهم
ملان آلام حدود وسدود
رسمت سحاب وراه شمس
بتوعد فينا لينا تجود
مسحت جميع رسوم إيدي
رقدت بعيد شريط معيود
وتعبت عيني من الشوف
وحلفت باليمين بتنوم
وهبت فوقي نسمة جميلة
زادت فيني حب النوم
وفجأة صحيت لقيتو صباح
وكان الهم حداي مردوم
وشلتو لبست توب الغم
ده ما بالكيف مصير محتوم
مسكت دريبي راجع ليو
وبحلم بكرة أحسن يوم
كلام الليل بِجيه نهار
بيمسحو بي كلام مسموم

وطن غرقان في بحر الهم...

وقفت هناك سحبت حجر
وشلتو وجيت عليك يا نيل
بدور احكيلك المصرور
قبل يطلع علينا فجر
قعدت عليو بديت أشرب
نسيم الليل سرحت أجر
واعاين للشدر في القيف
بيضحك مبتسم مُنشر
هو كان فرحان هو كان مالو !
بعاين ليو وشيشو يصُر
بديت أغرق واشوف احلام
وجمبي النيل كأنو فتر
واتاوق للأرض بعدت
هناك فاتت ولبست توب
خدار ممزوج بلون أسود
شدر صفصاف عليها طروب
لكزت النيل بدور أرقد
فترت من القعاد منصوب
وفتّح لي عيونو حُمر
وقالي الخير وشن مطلوب
وقالي كمان متين نمت
فترت عديل وقلت الروب
خجلت كمان أبيت أنضم
وشايف النوم غشاو يادوب
وقفت أشابي للقمرة
بدور ألمس وشيشا كمان
وضحكت بي خجل بعدت
وساقت للنجوم بحنان
عرفت السر وكان الغيم
بجرجر في الرجول كسلان
سرحت معاو سواده عجيب
سواد هماً غشانا زمان
وعشعش في القليب خيّم
وبدّل فرحي بالأحزان
هربت بعيد بدور أنسى
لقيت الرملة فاردة امان
فرشت عليها صنقرت
بديت أرسم حلم ممدود
مدن أفراح ابت تتلم
عجاجاً فرزعك مقصود
رسمت قلوب وفيها سهام
بتنزف والجرح مقدود
ومرة رسيم وشيش مبهم
ملان آلام حدود وسدود
رسمت سحاب وراه شمس
بتوعد فينا لينا تجود
مسحت جميع رسوم إيدي
رقدت بعيد شريط معيود
وتعبت عيني من الشوف
وحلفت باليمين بتنوم
وهبت فوقي نسمة جميلة
زادت فيني حب النوم
وفجأة صحيت لقيتو صباح
وكان الهم حداي مردوم
وشلتو لبست توب الغم
ده ما بالكيف مصير محتوم
مسكت دريبي راجع ليو
وبحلم بكرة أحسن يوم
كلام الليل بِجيه نهار
بيمسحو بي كلام مسموم

حليل امي...


في ليل مسدول كاسيه سواد
في غربة حزينة وناسها بعاد
وفي ظل ممدود من غير أبعاد
إمكن ظل قمراً ليه ميعاد
ممدود بين شجر أغصانه سواد
لمحت شبح
أو إمكن ضل
سارح في الليل تائه مُهمل
قرّبت قريب إمكن أندلّ
عن صورة توضح لي أكمل
سمعت نحيب بي صوت مذلول
مخلوط بأنين ممزوج بالذُل
ولمحت دموع سايلة بتهطل
وقفت قصادها بديت أسأل
عن سر مكتوم في جوف مُهملّ
رفعت للرأس بانت أجمل
لمحت عيونها
عيون أمي
وهي وين أمي !!
بعيدة هناك تسأل مني
كل طيراً جاي تسألوا عني
كيفن أمسيت في يوم مقضي
حسيت بدموع غصّت حلقي
ونار الشوق حرقت قلبي
دي ما أمي !!
وإمكن أمي ..
شن جاب أمي في ليل بعدي
أكيد بحلم بعيون أمي
أكيد بحلم أضمّ أمي
أكيد بحلم بي حضن أمي
صحيت من نومي مشيت أجري
كايس لو أسمع صوت أمي
بديت أضرب
تلفون بيرن وقليبي يئنّ
لو أمي ترد وعليّ تحن
وسمعت الصوت ودموعي جرنّ
حليل أمي ..

شناتا شنه

يا زول تعال شوف الخشيم
ممطوط تقول جاريه سيل
ولة الكضوم منفوخة كيف
منفوشة زي طشت الغسيل
وده كلو كوم ولة الكرش
تحلف تقول بالعالا فيل
وعيونا داقشات الغزال
كافتات شمال من غير دليل
والصوت كمان ما شفتو كيف
صوتاً خمير زي العويل
ووبّاً علي من شفتا
صاج العواسة اخير عديل
ولة الحبوب الفي الوشيش
طربيزة عِن حدّاد بخيل
ايديها واصلات الارض
ممدودة زي حبل الغسيل

ولة الخشيم الما خشيم
ده كبير وشين وش قندران
والنخرة ممطوطة التقول
خور في الخريف سايل كمان
ورجولا سكاكات عديل
لا لحمة فيها تقول أضان
والراس مدوقس فولة بس
فاضي ومحفر وقمله بان

حبيبتي غنوووم


يا زول تعال شوف الخشيم
ممطوط تقول جاريه سيل
ولة الكضوم منفوخة كيف
منفوشة زي طشت الغسيل
وده كلو كوم ولة الكرش
تحلف تقول بالعالا فيل
وعيونا داقشات الغزال
كافتات شمال من غير دليل
والصوت كمان ما شفتو كيف
صوتاً خمير زي العويل
ووبّاً علي من شفتا
صاج العواسة اخير عديل
ولة الحبوب الفي الوشيش
طربيزة عِن حدّاد بخيل
ايديها واصلات الارض
ممدودة زي حبل الغسيل

ولة الخشيم الما خشيم
ده كبير وشين وش قندران
والنخرة ممطوطة التقول
خور في الخريف سايل كمان
ورجولا سكاكات عديل
لا لحمة فيها تقول أضان
والراس مدوقس فولة بس
فاضي ومحفر وقمله بان

خواطر مجنونه...


في الليل داك
وفي نفس المكان الكان
بفتفت فيه كل الهم
واسوق أفراح بدل أحزان
أجيبا معاي من الحبان
ودفتر لف من الدكان
واجيب بالباقي منو لبان
واصنقر في الأرض وانجم
ولما ألف بكون فرحان
بكون هيمان
بكون خرمان
أفت الحمرا في الورقة
وأكب من فوقا سر الجان
ولي صباعي الصغير أمدغ
وأطلّع للبذر بحنان
وامسك للوريقة الحلوة
وأبدا ألف بخور الجان
وبلساني المرطب ديمة
ألحسا بالعرض بأمان
وأبرم للطريف الفوق
واشمّها زي حريف إدمان
واختّها في الخشيم المر
سواد شلوفته زي قطران
وكبريتي الملهلبة نارا
أشعل عودا زي بركان
وامرّر للهب بشويش
سجارة الدوكو دايرة حنان
ولنفيس البداية أجر
وألحقو بالتني بجنان
ويتقل راسي زي صخرة
ويبرد حيلي زي تعبان
واحس برجولي زي مافي
وأهبش فيها زي مرضان
وأبدا في دور من السرحان
وواصل في السجارة شراب
واشوف حاجات عجيبة كمان
أشوف غنماية في فستان
ممكيجة في خشيما لبان
ومرة كمان أشوفلي بحر
وفيه حسان بكل ألوان
وضحكات صاخبة منداحة
والكل بي فرح طربان
وأوصل بالسجارة هناك
محل شوشاوتا وازدان
وازغرت بيها زي نسوان
واجرجر للرجول أوقف
واهبش في الارض حفيان
نعالي نسيته وين ختيته
من جيت للمكان خرمان
وأمسك دربي زي برجل
أدوّر في المشي السكران
وأوصل بيتنا دربه أمان
واشيل الجك وفوت للزير
ده ريقي نشف نشاف البان
واقرطع للجكيك كله
وبرضي كمان بكون عطشان
وأفتح للمواسير سيل
وكل دقيقة بمشي كمان
وفي الآخر سريري حنين
يشيلني نعاس ونوم غمران